"Melnikov non le, ri, soña, chora e baila coa música."

Frankfurter Allgemeine Zeitung

Naceu en Moscova en 1973. Aos 12 anos interpretou o Concerto nº1 de Rachmaninov, aínda que el xamais se describiría como un neno prodixio, e recoñece que o que máis o marcou durante toda a súa carreira foi a relación tan especial que tiña co gran pianista Sviatoslav Richter, quen o convidaba regularmente aos festivais en Moscova e Tours. Melnikov combina o dominio da técnica rusa clásica cunha musicalidade reflexiva e sutil.

A súa gravación do ciclo de Shostakovich en 2010 para Harmonia Mundi recibiu o BBC Music Magazine Award 2011, o Choc de Classica como mellor álbum de 2010 e o Deutsche Schallplattenkritik 2010. Tras o enorme éxito do concerto ofrecido no Konzerthaus de Viena en novembro de 2010, interpretou este mesmo ciclo en Berlín, San Francisco, Amsterdam, Anveres e Toquio.

Tamén gravou para Harmonia Mundi as sonatas completas para violín e piano de Beethoven, coa súa acompañante habitual, a violinista Isabelle Faust. Esta colaboración valeulles o ECHO Klassik Prize de Alemaña e o premio Gramophone 2010. O CD, que é xa unha referencia mundial deste repertorio, foi ademais nominado para os premios Grammy. Melnikov gravou outros nove CD para Harmonia Mundi, tres deles como solista con obras de Rachmaninov, Brahms e Scriabin, respectivamente.

Tocou nalgunhas das salas máis importantes do mundo: Concertgebouw de Amsterdam, Suntory Hall de Toquio, Alte Oper de Frankfurt, Théâtre du Châtelet de París e Wigmore Hall de Londres.

Como solista colaborou con orquestras tan prestixiosas como a Orquestra Nacional de Rusia, Tokyo Philharmonic, Gewandhaus Orchestra de Leipzig, Philadelphia Orchestra, Rotterdam Philharmonic, Royal Concertgebouw Orchestra, BBC Philharmonic Orchestra, Orquesta Sinfónica de Madrid, Mahler Chamber Orchestra ou Concerto Köln.