O conxunto vocal e instrumental Capilla Flamenca toma o seu nome do coro da capela que o emperador Carlos V tiña na corte. Ao deixar os Países Baixos en 1517, o emperador levou consigo a España os mellores músicos, para que así o acompañasen como "polifonía viva". Hoxe, Capilla Flamenca tamén está formado por músicos de Flandres que dan vida de novo a ese timbre único e especial da música dos séculos XIV, XV e XVI.

A especial e transparente polifonía de Capilla Flamenca xorde da creación interactiva entre os músicos, o que esixe pola súa parte un profundo coñecemento dos aspectos técnicos, poéticos e históricos da música polifónica. Partindo deste amplo repertorio polifónico, elaboran programas únicos que ás veces incorporan outras disciplinas artísticas como a danza.

Capilla Flamenca recibiu numerosos premios como recoñecemento ao seu gran traballo de investigación histórica e pola súa mestría artística e musical. Entre outros, o Premio Internazionale Il Filharmonico, o Cultuurprijs Vlaanderen 2005 e o Hertog van Arenberg 2006. Numerosos CD da súa ampla discografía foron igualmente premiados con varios Prix Chocs de Le Monde de la Musique, Diapason d'Ors e Répertoire 10. Ademais recibiron tres premios Caecilia, outorgados pola crítica musical de Bélxica, e unha nominación ao premio Gramophone de música antiga 2011.

Dirk Snellings é un dos fundadores do grupo e o director artístico. O seu repertorio abrangue desde o Renacemento ata a música contemporánea, facendo fincapé na polifonía e na música barroca. Precisamente esta tensión entre o antigo e o novo levouno ao que el considera un reto excitante: a procura dunha técnica vocal propia de cada período, de cada estilo e de cada xénero musical.

Tamén traballou con grupos como Il Fondamento, La Petite Bande, Le Parlement de Musique e Ex Tempore.