VIDA Guitar Quartet é o resultado da unión de catro guitarristas excepcionais que decidiron apostar pola música de cámara, a súa gran paixón. Está formado por Mark Ashford e Amanda Cook, cada un deles cunha sólida e recoñecida carreira internacional como solistas, e por Mark Eden e Christopher Stell, que foron durante anos o famoso Eden-Stell Guitar Duo, un dos mellores dúos de guitarra do mundo.
Desde 2007, ano en que comezaron a funcionar como cuarteto, tocaron nas mellores salas de Reino Unido incluíndo King’s Place e Purcell Room (Londres), The Sage (Gateshead) e St Georgeʼs (Bristol). Convertéronse nun grupo moi solicitado polos grandes festivais de Europa e tamén dos Estados Unidos.
En 2011 VIDA Guitar Quartet debutou en Los Angeles e Nova York, ademais de ser artistas residentes en varias universidades de California, onde regresaron en marzo de 2012. Desde aquela, o grupo formou parte das programacións dos festivais de guitarra de máis sona dos Estados Unidos, como o Long Island Guitar Festival e o Allegro Guitar Series de Dallas, Fort Worth e Las Vegas.