A celebración do cincuenta aniversario do Conservatorio de Ourense a pasada primavera, que tiven o pracer de coordinar, ofreceunos unha cálida e ilusionante resposta do público que alimentou un novo reto: a creación dun festival de música clásica.

A idea tomou forma e medrou no transcorrer do verán, e finalmente materializouse neste programa que vostede ten ante si.

Non resultou doado. Apostar por un festival que nace con vocación de continuidade, nunha parcela cultural tan específica, esixía das institucións públicas e privadas unha visión innovadora e creativa, e depositar a súa confianza nun proxecto construído en Ourense e para Ourense. Felizmente, o Concello, a través da Concellería de Educación, tan sensibilizada coa formación artística da cidadanía, mostrou unha vontade firme e inequívoca non só de apoialo, senón tamén de asumilo como seu no papel de organizador.

Ao sostén do Concello de Ourense, engadiuse o importante apoio dun prestixioso grupo empresarial ourensán, S.A. de Obras y Servicios, COPASA, que demostrou a súa sensibilidade sustentando a iniciativa dende o primeiro momento. O meu máis profundo agradecemento a ambas as dúas entidades.