PRESENTACIÓN
Saúdo do Alcalde

O Festival Internacional de Música Pórtico do Paraíso, logo dunha década facéndonos soñar con propostas musicais de excelente nivel en auditorios inimaxinables, segue o seu camiño sen perder a capacidade de nos sorprender. A décimo primeira edición, do 2 ao 11 de marzo, preséntase cun cartel ao que se suman importantes novidades.

Para este 2018, a igrexa de Santo Domingo únese á lista de espazos musicais, para a que tamén se recupera o salón nobre do Liceo e á que haberá que engadir outros dous enclaves da nosa provincia: a igrexa de Santa María de Gracia de Monterrei e a colexiata de Xunqueira de Ambía. Teatro Principal, Museo Arqueolóxico e catedral de Ourense completan a nómina de lugares incomparables en que gozar das voces, das notas musicais… e dos instrumentos. Estes, que están representados na pedra policromada do século XIII, volverán cobrar vida no lugar mesmo en que foron tallados grazas ao concerto inaugural de Carlos Núñez, pero tamén ao gran labor do obradoiro da Deputación Provincial de Ourense, dirixido por Manuel Brañas.

Cómpre agradecer, unha vez máis, a cooperación institucional entre o Concello de Ourense e a Deputación Provincial de Ourense, pero tamén da Xunta de Galicia a través da Axencia Galega das Industrias Culturais. Grazas ao esforzo de moita xente, podemos presumir dun ciclo aberto á participación da cidadanía e pensado para as persoas. Só así se entende un festival que combina o pracer de escoitar co de aprender, debido ao seu labor divulgativo e formador de vocacións, moi especialmente entre o alumnado do Conservatorio de Música.

Cada concerto é singular e irrepetible, así que destacar un faise especialmente difícil. Porén, a clausura no Teatro Principal promete ser un evento único coa actuación de Antonio Serrano, harmónica do mestre Paco de Lucía, ao fusionaren os ritmos flamencos co jazz de Albert Sanz ao piano.

Unha nova etapa, pois, no compromiso coa calidade e co desexo de facer a nosa cidade cada día un lugar mellor.

 

Jesús Vázquez Abad

ALCALDE DE OURENSE