PRESENTACIÓN
Director artístico

Foto_Director

1218-2018, oitocentos anos desde o inicio das obras do Pórtico do Paraíso. A unha efeméride así cumpríalle unha programación especial, e que mellor que xuntar a recuperación dalgúns dos instrumentos do Pórtico coa súa estrea no concerto inaugural, a cargo do noso músico máis recoñecido, Carlos Núñez, que, deixando a un lado a súa faceta de músico folk, intérnase no repertorio medieval acompañado de grandes especialistas. E, falando deles, aproveitamos a súa presenza en Ourense para gozalos noutros dous concertos do festival; por un lado, en Monterrei –nova localización este ano– onde os magníficos Arianna Savall e Petter Johansen propóñennos unha viaxe de amor pola Europa renacentista e barroca e, por outro, no Arqueolóxico, co marabilloso tenor Wolodymyr Smishkewych, acompañado polo organistrum, que nos presenta os delicados límites entre o sagrado e o profano na Europa medieval.

Para fecharmos este grupo de concertos de música antiga, o aclamado tenor Marco Beasley volve ao festival, esta vez acompañado polos instrumentistas Stefano Rocco e Fabio Accurso, a unha nova sala –a igrexa de Santo Domingo– presentando un programa que nos sitúa nos albores do Barroco.

Pero non todo é música antiga no festival. A presenza de Vida Guitar Quartet, un dos grandes cuartetos de guitarra actuais, no Liceo, faranos gozar da sonoridade inédita no Pórtico de catro guitarras clásicas, cun fascinante repertorio do século XX; ou a do espléndido sexteto vocal Ingenium Ensemble, en Xunqueira, que ofrecerá un programa absolutamente ecléctico tan ao gusto do noso público. Por último, a nosa primeira aposta pola senda do jazz, e ata do flamenco, cun grandísimo virtuoso da hármonica, Antonio Serrano, acompañado ao piano por Albert Sanz no Principal. Será, sen dúbida, unha clausura acorde cunha edición tan singular.

Así é este Pórtico. Sete concertos, sete salas, sete extraordinarias experiencias sensitivas ao alcance da man. Merece a pena intentar non perder ningunha delas.

Juan Enrique Miguéns