PRESENTACIÓN
Saúdo do Presidente da Deputación

Que o Festival Pórtico do Paraíso é unha referencia cultural de alto nivel e perfectamente consolidada na nosa provincia no ten ningunha dúbida, máxime cando estamos neste 2018 celebrando a súa décimo primeira edición, co que se foi demostrando durante todos estes anos o acerto do proxecto e o respaldo do público ourensán, pero tamén de moito que de fóra da nosa provincia se achegou a desfrutar de grandes concertos en magníficos recintos de alto valor patrimonial.

Nesta XI edición achéganse a Ourense representantes musicais de España, Eslovenia, Estados Unidos, Suíza, Reino Unido ou Italia, pero sumarase tamén a representación de Galicia cun músico de extraordinario nivel como é Carlos Núñez, acompañado polo seu grupo instrumental e vocal, que nos deleitará a todos coa súa demostrada maxia artística, mesmo ao lado do pórtico que dá nome a este festival e do que saen parte dos instrumentos que soarán no seu concerto, grazas ao magnífico traballo de reconstrución que se fixo dende o Obradoiro de Instrumentos Musicais da Deputación de Ourense, que dirixe Manuel Brañas e que contou coa colaboración directa dunha autoridade internacional nesta materia, como é o francés Christian Rault.

Para a Deputación de Ourense é unha cuestión estratéxica a difusión da cultura por todo o territorio provincial, por iso nos sentimos moi satisfeitos de poder levar parte do programa a lugares tan emblemáticos como a Igrexa de Santa María de Gracia de Monterrei ou a Colexiata de Xunqueira de Ambía.

Por último, quero destacar a decidida implicación do Concello de Ourense, así como da Xunta de Galicia a través da AGADIC, e, como non, felicitar á Asociación Pórtico Musical que, como colaboradores, nos demostran gran profesionalidade e garantía de que un ano máis este festival acadará pleno éxito de público.

Manuel Baltar

PRESIDENTE DA DEPUTACIÓN DE OURENSE